مساء الخير بنات :)
انتشرت في الفترة الأخيرة مقشرات القهوة ، بدءاً من مقشر فرانك اللي عمل ضجة كبيرة ومن ثم باقي الماركات اللي أطلقت مقشرات القهوة المختلفة ..
أنا هالمقشر استخدمه من فترة ، وأسويه في البيت بروحي ، بس للأمانة ، أنا ما استخدمت لا مقشر فرانك ولا غيره من مقشرات القهوة الجاهزة ف مارح اقدر اقارن بينهم لكن رح اقول لكم اللي شفته من هذا المقشر ..
أولاً : فوائد المقشر :
- أهم وأول فائدة منه أهي الترطيب وإزالة الجلد الميت .. أنا بشرتي جافة وجسمي دايماً جاف مهما أرطبه ، المقشر بسبب الزيوت اللي فيه يرطب لي جسمي ويزيل الجلد الميت وهذا أهم شي خلاني استمر عليه ..
- يوحد لون الجسم ، مع الاستمراار
- معروفة القهوة انها تساعد على شد الجسم وتخفيف الخطوط اللي في الجسم " علامات التمدد " ، أنا فعلاً لاحظت أن الخطوط خفت في جسمي لكن حبيت أوضح إني استخدم زبدة بالمرز لعلامات التمدد بعد استخدامي للمقشر .
طريقة عمل المقشر :
( المقادير ) :
- ملعقتين طعام قهوة تركية
- ملعقة شاي بودرة الكاكاو
- نص ملعقة شاي زيت زيتون
- نص ملعقة شاي زيت جوز الهند
ملاحظة : ( هذي الكمية تكفي لاستخدام واحد للجسم )
ممكن تزيدون الكمية حسب حاجتكم أهم شي مايكون القوام سائل جداً ولا ناشف جداً
اذا حسيتوه صار سائل زيدوا شوي قهوة واذا صار ناشف زيدوا شوي زيت .
طريقة استخدام المقشر :
والجسم مبلل وزعي كمية من المقشر على كل جسمج وقشري بكف يدج بحركات دائرية
اتركي المقشر من ربع ساعة إلى عشرين دقيقة على الجسم ، وبعدين اشطفيه
( في ناس يفضلون يستخدمونه بعد استخدام الصابون ، وفي ناس تفضل تغسل بالصابون بعده ،
بالنسبة لي افضل ما اغسل بالصابون بعده عشان تبقى الزيوت في جسمي ومايروح الترطيب ،
لكن للي ماتحب ريحة القهوة تبقى بجسمها تقدر تستخدم الصابون عموما الترطيب مايروح بشكل كامل بعد الغسيل )
ملاحظة مهمة :
أنا جربت المقشر فقط على جسمي ماجربته أبداً على ويهي ، وما أنصح بتجربته على الوجه لأني أحسه قاسي شوي
على بشرة الوجه ، لكن اللي حابة تجربه على ويهها أفضل تجرب على جزء صغير عشان تتأكد اذا يحسس بشرتها أو لا
استقبل اقتراحاتكم وملاحظاتكم في الكومنت
وشكراً وايد على المتابعة :)
ليست هناك تعليقات:
إرسال تعليق